Uitfasering van RSG nuusbesprekingsprogram ‘n oortreding van redaksionele beleid

Die VF Plus het vandag ‘n klagte by die Onafhanklike Kommunikasie-owerheid van Suid-Afrika ingedien oor die uitfasering van RSG se gewilde nuusbesprekingsprogram “Kommentaar” op Sondagaande wat glo deel is van die proses om ou programme met nuwes te vervang, sê Anton Alberts, VF Plus parlementêre woordvoerder oor Kommunikasie en Dr Pieter Mulder, VF Plus nasionale leier.

Dit volg na ‘n berig in Rapport dat die SAUK-woordvoerder, Kaizer Kganyago wel op 18 Junie 2016 die uitfasering van dié program bevestig het.

Die VF Plus is van mening dat die SAUK se lisensievoorwaardes en redaksionele beleid oortree word aangesien die beleid bepaal dat die uitsaaier ten alle tye billikheid, onpartydigheid en balans moet nastreef en dat wye verskeidenheid standpunte geakkommodeer moet word.

Die VF Plus dring verder daarop aan dat die Onafhanklike Kommunikasie-owerheid van Suid-Afrika die klagte moet ondersoek en verdere stappe teen die instansie neem om die onbillike opdragte van die SAUK-bestuur tersyde te stel.